Марко Постів-Яруга ■ ЛЕМКІВСКА СТОРІНКА ■ №16, 2021-04-18

Римо-католикы глони в часi коронавiруса цiлий листопад на цмонтерi ходили, гробы предкiв квiтьом прикрашали и сьвiчку на них сьвiтили. Сьвiту в тот спосiб голосили, же о блискых вiчна в них памят. Сьвiдоми-м того, же сут такы, котры гробы блискых собi осiб цiлий рiк одвиджают, а не лем в листопадi. Серед нами такых люди тiж не бракує. Так си тепер лем думам, а може бы сме  и мы в Воскресiня Христове, Томину Недiлю або Зелены Сьвята навiдiли цмонтерi воякiв І-ой Сьвiтовой вiйны. Прецiн ходиме товды на гробы нашых блискых и знаємых. На цмонтерях, на котры хочу вас вытягнути, тiж може лежат дакы нашы люде. Кєд нi и так вартат там пiти, повiрте на слово. Чудны сут то мiсця, загыблы воякы лежат в земли, за котру душу свою Богу оддавали.

Хто на них лежыт?

На нашi и сусiднi земли (польскi и словацкi) тiсячы склали головы и юж понад 100 рокiв в нас (далеко од рiдных сторiн) ждут голосу сурмы посьлiднього Господнього ангела. Вартат и нам зайти на тоты цмонтерi, не лем за то, же посьлiдныма роками сут одновляны, не зато тiж, же iншы iх одвиджают. Цмонтерi воякiв І Сьвiтовой вiйны дiстают другу молодiст, однову завдячают сотным роковынам славетной битвы пiд Горлицями. На жаль, нашы дiдове ту не лежат, iх в бiльшосты австрийска влада высилала на фронт iталийскi. Там тiж было тяжко, дуже жовнiрiв австрийской армii, котры на тiм фронтi згынули, были Руснаками. Влада там iх выслала, бо з Італянами, так легко як з Росиянами, ся юж не могли доґадати. Там з початку, адже од черця 1915 рока, бороли ся головнi Австриякы, Словенцi и Хорваты, пак на тот фронт шмарено полкы змобiлiзуваны з прешiвской землi, де Русинiв не бракує, до них долучено и галицкых Руснакiв. Вшытко залежыт од того, коли нашы дiдове там згынули, кєд до вересня 1917 рока, то лежат в земли гнешньой Словенii, товды Австрия цiлий час ся ищы лем боронила. Кєд погыбли пiзнiжше, то гiрше, бо на iталяньскi землi душу Богу оддали, а она до Австриi, за котру жытя ту пострадали, не належала. Они там такых крас цмонтерiв, як в нас збудувано, на жаль, хыбаль не мают. Мойому дiдови и дiдови мойой жены ся пощастило, оба од тамале вернули жывы. Талергоф пережыли, адже війна не была iм юж така страшна. Дiдо Девнозий домiв з нєй не лем з гвером на плечох вернули, але аджи з медалями на грудьох, зо срiбным и бронзовым.

Австрия нашыма прекрасныма цмонтерями ушанувала не лем своiх воякiв, тiла вбитых жовнiрiв росийской армii тiж з таком самом честьом и гонорами на них похоронено. Воякы, будучы по другi странi жытя, юж з собом не ворогуют, мирнi лежат поруч себе. В єднi лiниi згiднi iх поклали, тепер не смотрят на себе вовком, позерают не в сторону окопiв противника, а згiднi на всхiдню. Разом ждут того самого, другого пришестя Предвiчного Бога.

Християньскє лице війны

Аджи товды, коли ищы до ся стрiляли, кєд на ся з багнетами насадженыма на ґвер ишли, мож было часами почути як єден в другого голосно помилуваня просил: Братку, даруй мi! Нераз оповiдали о тiм и iншы люде, котры были наочнима сьвiдками, котры тiж барз тяжко тото пережыли. На такє ани смотрiти никому не єст легко. Воякы, хоц носили iншы унiформы, але розумiти ся мусiли, бо справдi єден другому дарувал. Каждий одишол до своiх окопiв, а ранений остал в нашiм селi. Своi го не взяли, за дня лежав пiд окапом лемкiвской стрiхы, на лалцi пiд выглядом го уложыли, де цiлий час з болю лем йойчал. Пак, кєд нихто по нього не пришол, ґаздове взяли го до середины, но бо не годит ся розслабленого на дворi на нiч лишыти. Істи, не iл нич, бо багнетом дiстал в брiх. Спал на припецку, але над раном ся му гмерло. Мусите знати, же тоты воякы, котры ту в нашi землi лежат, зажыли вшелиякого горя, страху нераз ся гiднi наiли, болю ворог iм тiж не жалувал, нераз йойчаня пораненых, полишаных медже ворожыма окопами, до села было чути. Мiцно того роду подii в нашу памят ся занюрили, кєд внукы наочных сьвiдкiв тото оповiдают до днес.

Не лем австрийска вельонародня армія залягла на Пустках

Мусите знати, же Австриякы мали єдну армiю, але народiв в нiй было купа, воювали в нi Австриякы, Мадяре, Чехы, Словакы, Полякы, Сербы, Словенцi, Хорваты, Босьнякы, Жыды. Руснакiв ци Украiнцiв тiж в нi не бракувало. Так, так, нашы дiдове гынули не лем на iталяньскiм фронтi. Пак перед майом 1915 рока пiд Горлицi пришли и нiмецкы вiйска. Цмонтерi воякiв погыблых в І Сьвiтовi вiйнi на лемкiвскi земли збудувано немало, вшыткы сут прекрасны. На нашi земли найчастiжше проєктувал iх, а пак дозерал iхньой будови, Душан Юркович, Словак. На неєднiм певно сте были и знате, же не циганю, сут гарды, што там гарды, они сут прекрасны, але не знам ци не найгарщым медже нима єст не наш, а лужняньскiй. Зовут го Pustkаmi, то 123 цмонтiр не так давно вписаний на листу Знакiв Європейской Спадщыны.

Краса Пусток

Лужняньскы Пусткы порожнi не сут и хоц ту немало лягло воякiв, на переповнены не выглядают. Мирнi лежат си тепер аджи тоты, котры за жытя завзятi зо собом воювали. На Пустках спочыли тлiнны останкы: 912 жовнiрiв австро-угорской армii, 65 нiмецкых жолдакiв, но и 227 русскых солдатiв. Тепер жадны окопы ани засiкы iх юж не розєднуют, разом ждут воскресiня. Не знам, ци добру мали смерт, але мiсце на жданя приходу Всемогучого Бога (вдруге на сьвiт приходячого, жебы судити жывых и мертвых) мают прекрасне. Думам, же ани цiсар, ци цар, за котрого воювали, кращого хыбаль не має. Кєд єм там першы раз поставил ногу, згадали ся мi вiденьскi огороды  Schönbrunn. Хто был в парку австрийской цисарйовой Сiссi (жены Франца Йозефа), знає о чiм бесiдую. Душан Юркович напевно знал красу вiденьскых цисарскых огородiв, и за то на вiчний спочынок тым, котры в Лужнi за цисаря воювали, обрал Пусткы. Хоц од тале далеко до Вiдня, то и так цисарскы воякы спочивают ту на лужняньскых Пустках як цисарi. Мы, кєд при горiшнi ґонтинi стоiме, цисарской палаты не видиме, але воякiв юж ани час, ани простiр не обмежує. Тепер юж нихто iм не розказує, жадна вiйскова трубка, жаден добошiв бубен од тале iх не рушыт. Они лем єдной трубы фурт ту наслухуют, а кєд голос єй од горы ся одобє, будут знати, же на посьлiднi суд Цар царiв юж кличе, товды встанут.

На Пустках царює войскови порядок, каждi нациi проєктанты розбыли осiбны обозы для iхнього вiчного спочынку (так на всякi випадок, прецiн по тамтi странi жытя нихто з жывых ищы не был). Інжынєры того миру медже нима не были хыбаль такы iсти. Ґалчыньскiй прецiн в верши навет жывых оборонцiв Вестерплятте до раю чвiрками пiслал, та чом они не могли бы з тамтой стороны своiх жывых друзiв всперти, каждий своiх.  Кєд будувано нашы цмонтерi, вiйна од тале лем кус дальше ся одкотила, товды єй кiнця ани не видно было, воякы дальше гынули, але тепер юж на iншi земли. Од тале юж ниґда и ниґде не пiдут, адже и мы iх ниґде не высилайме, ту мают сьвяти спокiй, ту аджи жывы приходят од жытєвых тягарiв ся увiльнити и одпочати. Душа и ум ту одпочне, але не ногы, хто был в огородах Шенбрунн, знає што мам на думцi. В Лужнi не є фонтанны з Нептуном и вельо iншых ищы атракций того вiденьского цисарского парку, але єст ту подiбнi. До горiшньой ґонтины можете тiж зайты рiжныма стежками. Кєд вас ногы заболят (рiжниця позему в теренi, котри мусите перейти, єст велика), можете си присiсти на лалочцi и одпочати, кєд нич вас болiти не буде, тiж си сядте и позрийте на право и лiво, в гору и в дiл, взрите красу Божого сьвiта. Подумайте, ту даколи нашы предкы мусiли прогнати росийскых жовнiрiв од тале, котры на самi горi ся окопали. Нам самым трудно часом ту выйти, а они мусiли не лем ґвер з амунiцийом двигати. Декотры мали тяжкi машыновий куломет, котри был без колiчок, а мал понад двадцет кiльо вагы. Нераз треба было го на фрасову убiч внести, на таку як на лужаньскых Пустках, але вiн не лем пiд гору был тяжкi. Сам стрiляти не мiг, все потрiбны были ищы патроны и воякы, адже цiлий час треба было ся варувати од ворожых куль.

Двораменний крест

Што ж вам буду оповiдал, кєд пандемiя ся скiнчыт – сами там зайдте, тепер можете пiти лем за тым мотузком (лiнком): http://www.pustki.luzna.pl/index.html. Тот цмонтiр, як пристало на найбiльший и найгарщий, має свою страну, аджи дочекал ся малой монографii[1], але хыбаль не завадит пiдповiсти на што конечнi треба звернути увагу, кєд там юж будете. 

Кєд на нього гвойдете – шмарит ся вам в очы крест св. Методия, кєд на Пусткы гвойдете головном брамом, глядайте го по лiвi сторонi. Пiд ним похоронено хыбаль Словакiв, прецiн мают го в своiм нацйональнiм гербi. Єст iхнiм прапором, а повиже нього лежат росийскы жовнiре. Недуже ту iх згынуло, окопы мали на горi и ворожы загоны як на долони. Душан Юркович тiла iхнi може за то ту поклал, же iм найближе до Словакiв и Руснакiв.  О красi того мiсця юж єм бесiдувал, тепер час на цiкавы елементы, такы як згаданий юж крест св. Методия. Симетричнi на протилежнi странi цмонтеря маме на высокiм камiннiм столпi зображену урну, тiж з каменя. На впрост головных цмонтерных ворiт уставлено сымволiчний саркофаг в видi камiнной домовины уставленой на катафальку. На нiм умiщено пропамятну таблицю з такым написом:

В жытю розєднаны,

В смерти зєднаны.

Нихто не зна iхнього iмена.

Камаратя и ворогы,

Кым были, што в собi мали?

Згасло, проминуло.

Єдно остане незмiнне:

Іхня вiрнiст!

 Од того памятника дорога поведе нас на лiво до двораменного креста або на право до колюмны з урном, доокола котрой лежат хыбаль головнi Мадяре, але в iхнi армii Русинiв прецiн тiж не бракувало. Кус выжше, понад урном, маме три трикутны стелi, коло котрых в своiх гробах лежат пушкаре (артилерия), саперы и незiдентифiкуваны австрийскы воякы. Лежат си окремо, бо iх не было так дуже як пiхоты, але важну ролю в тi бытвi одограли. Од них дорога провадит до трьох, кус выжше прицупненых, трикутных стель, котры поставлено головнi офiцерам. При єднi зобрано воякiв служащых пiд рiжныма полководцями и в рiжных регiментах, за то при нiй гробiв єст веце, як при iншых стелях.

Корона св. Штефана в першым ряді амфитеатра

Може юж дос о тiм, што сами можете там вздрiти, повiм ищы лем тото, чого вшыткы не знают. З таблицi вычытате, же при горiшнi, головнi, цмонтернi каплицi находят ся два помникы, звiнчены короном св. Штефана – короля Мадярiв. Перед Душаном Юрковичом обовязково шапку треба зняти, на Пустках зробыл майстерштык, котри перебє аджи вiденьскы огороды Шенбрунн. Был справжнiм iнжынєром- архiтектом, вояком и богословом. О самi ґонтинi мож было бы осiбну статтю написати, кєд там будете – то тiж вшыткого голым оком одраз не выiмате. Знам, што раджу.

Амфiтеатр

Завдякы знимкам, не моiм, а тым, якым нашол в iнтернетi,  достерiга-м генiй Юрковича. З горы лiпше видно амфiтеатр, знимку хыбаль зроблено з дрона. Юркович каждым своiм цмонтерьом вписал ся до iсториi, Пусткы не сут вынятком. Його цмонтерi сут такы, якы сут, не лем за то, же Душан Юркович iх запроєктувал, але и за то, же сам стежыл за тым, як майштрове iх реалiзуют, на мiсци хыбаль был закля сiл до проєкту. Допєро, кєд вiдiл єм тоту знимку, зроблену з iншой перспективы (не пiшеходця), спостерюг єм, же горiшня част цмонтеря на Пустках припоминат амфiтеатр (смотте на знимку ч. Х). Маме в ним одвернену перспективу, як в iконi, сцена єст не на долинi, як в грецкых античных амфiтеатрах, а на вершку горы. Ґонтина стоiт на лужняньскiм Олiмпi, очы каждого вояка, котры ту на вiкы лягли, звернены сут на каплицю. Кєд бы не тота знимка з дрона, певнi бы-м не одчытал той пребогатой, богословской думкы Душана Юрковича, на мiсци достерiгал єм лем тото, же цмонтiр на Пустках врiзує ся в лiс, вытинаючы в нiм трикутник, а то тiж символ Бога. Кєд єм там на мiсци з долины тото спостерюг, думал єм си, же воякы, котры ту жытя своє оддали, вырубали си ту выгляд до неба, а  же штораз менше iх было, то штораз меншы фалат лiса рубали. Кєд виджу зарыс того цмонтеря, то  припоминат мi видок з замкового выгляде. В такых выглядах зо двору отвiр єст невеличкi, в серединi замкови выгляд розшырят ся на обi страны. Така форма выгляде для обороны дає бiльше поле обстрiлу, а завдякы малому отворови ворогам тяжше трафити стоячого в ним оборонцю.  Выглядат так, якбы воякы зобрали ся ту на горi на небеснi Службi Божi, пришли хыбаль яко делегация цiлого вiйска, яко вiйско гонорове и параднi в коло каплицi-ґонтини ту станули на вiчну службу. Лежат ту кругом, адже сут знарядьом Бога, Бога в iконi все символiзує колесо, за то каждий сьвятий вколо головы має нiмб. Перед собом мают двох полководцiв, єден очолил лiве, а другi праве крыло лужняньской небесной сотнi, полководцями сут помникы з короном св. Штефана на вершку. Такы подвiйны кресты, вiнчаючы Штефановий ?королiвску корону найдете и на iншых обелiсках того цмонтеря.

Копійник

Барз цiкави єст тiж крест неописаний на iнформацийнi таблицi, найдете го над бальконом з крестом (на таблицi єст означени буквом „К”, там бiльше єст такых видоковых бальконiв, але з крестом єст лем єден).  То так званий копiйник, такi характерний, мадярский або ищы и передмадярский звычай, през Мадярiв лем од дакого перенятий и плеканий. Копiйником го зовут, бо кєд лицар в бою впал, похоронено го там, де душу Богу оддал, а в могылу вбито його копiю, до котрой меч ищы привязано, жебы ворог знал за яку вiру ся борол и в што вiрил. Там, де пiшол, жадна зброя не єст му юж потрiбна. 

Там справдi вартат пiти, на Пусткы приходят и тоты, котры тото мiсце барз добрi знают. Знают, де приходят, єдни приходят, жебы одпочати, iншы на Пустках прiбуют лишыти тягары свого жытя, ту деякым людям лекше найти в собi деси затрачений юж внутрiшнiй спокiй. Іншы приходят, жебы задумати ся над жытьом, бо ту лекше в собi найти поклады все в нас iснуючой сыли, котра так як ласами ? и наша земля лежат угором. Ту хыбаль каждому лекше буде найти затрачену дорогу до себе и до сьвiта. Адже своi цмонтерi шануйме, а iншы познавайме, бо все варто чужу культуру знати, а не лем свою. Не лем познавайме, розумiйме єй, приставати до нєй не мусиме.

Фото автора статті

---

[1]           http://www.plenerownia.com/wp-content/uploads/2018/11/1_Przewodnik-multimedialny-Luzna-Pustki.pdf  Під іншым інтернетным адресом найдете знимкы образуючы як Пусткы визерали перед величезным ремонтом, сут ту: https://www.flickr.com/photos/mik_krakow/sets/72157623765817049

Поділитися: