Богдан Салей ■ ЛЕМКІВСКА СТОРІНКА ■ 2009-07-02
В Горлицях 6 червня офіцийно розпочато діяльніст Центру культури ім. Богдана-Ігоря Антонича. Так буде ся називати будинок, котрий ОЛ в перших днях квітня купило на пляцу Двориско, в центрі Горлиц. В самім будинку ОЛ плянує провадити головні культурну і освітну діяльніст. Бюро Головной управи ОЛ хоче утримати в орендуваних од староства поміщинях колишньой медичной школи при ул. Яґели.
Інавґурацію діяльности Центру поєднано з традицийним шевченківским святом. Шкільна молодіж з Пряшева показала приготовлену під керівництвом Ліни Гладь інсценізацію поеми Тараса Шевченка “Марина”. Свій поетично-музичний монтаж представила тіж гімназийна молодіж з Гладишова, Маластова і Горлиц. Доповніньом програми била мультімедійна презентація о. Романа Дубеца, посвячена Пересопницкій евангелії з ХVI ст.
На урочистости присутний бив Горлицкій епископ Православной церкви владика Паїсій і місцеве духовенство, православне і греко католицкє. В своїм виступі бурґомистер Горлиц Казімєж Стеркович запропонував влучиня будинку Центру до пляну реновації пляцу Двориско. На осін заплянувано участ Центру в загальноукраїньских святкуванях 100 річниці народжиня Б.-І. Антонича. Комітет святкувань збере ся під час Лемківской ватри в Ждини.
По довгих роках стараня ся о будинок давной Руской бурси (в котрих то старанях ОЛ на початку 90 років одограло вирішальну ролю), коли явном стала ся безперспективніст тих заходів, бо нияки представлени пропозиції штодо співкористуваня і співвласности будинку Руской бурси не дочекали ся акцептації Стоваришиня Руска Бурса, котре стало ся в медже часі фактичним господарьом будинку і зачало твердо голосити о “неможливости співіснуваня з украіньском організаційом”, ОЛ рішило ся глядати іншого виходу. Закуп будинку Центру ім. Б.-І. Антонича одбив ся з коштів цільовой дотації інвестицийной од МВСіА на Центр культури ім. Б.-І. Антонича для ОЛ, яко організації національной меншини. ОЛ забезпечило свій вклад, передвиджений в програмі фінансуваня проєкту.
Мож ся сподівати, же вигідни поміщиня Центру позволят Обєднаню лемків в повни розвинути діяльніст на культурній і освітній ниві, котра протягом майже 20 років існуваня організації мусіла ся обходити без ниякой матеріальной бази. Без ньой не можливе било проваджиня бібліотеки, громаждиня памяток культури, організація позашкільной освітной діяльности, тяжко било думати о циклічнім святі поезії, виставці мистецтва, пробах музичних ансамблів. Така діяльніст в винаймуваних поміщинях ниґда не била стабільна.
Амбіції Центру не можут ся єднак ограничати до самой Лемківщини, його пропозиція повинна доходити до вшитких спрагнених рідной лемківской україньской культури в єй найбарже цінних проявах.
Вибір особи покровителя культурной діяльности Центру – Б.-І. Антонича, то вибір орієнтації не лем національной ідентичности, але тіж естетичних і етичних вартости. Покликувати ся в своїй діяльности на імено великого поета родом з лемківской Новиці, то великий і не простий виклик, котрий вимагат творчого підходу і почутя міри в поєднаню того, што в культурі реґіональне, національне і універсальне.
“Наше слово” №27, 5 липня 2009 року {moscomment}
