XXVII СВЯТО лемківской культури «Лемківска ватра» в Ждини (17-19 липня 2009 р.)

Програмна рада XXVII Свята лемківской культури «Лемківска ватра» в ЖдиниЛЕМКІВСКА СТОРІНКА2009-07-09

{mosimage}

Тогорічна Лемківска ватра в Ждини зостала присвячена 100 річниці народжиня Богдана-Ігоря Антонича (1909-1937) – поета з Новиці, котрий оспівував Лемківщину в україньскій літературній мові. Творчіст т.зв. лемківского Словацкого представлят на сценах Лемківской ватри артисти Академічного театру ім. Леся Курбаса зо Львова і учні ІV Ліцею з Лігниці.
Почесний патронат над Ватром приняли: Президент Републики Польща Лех Качиньский і Президент Словацкой Републики Іван Ґашпарович.
На сцені тогорічной імпрези виступлят артисти з Польщи, України, Канади, Словаччини, Хорватії і Сербії. Реґіональну лемківску культуру представлят м.ін. колективи пісні і танця: “Лемковина” зо Львова, “Кичера” з Лігниці, “Ославяни” з Мокрого, колектив ім. Тараса Шевченка з Сербії. Виступлят хори “Лемківска студенка” з Борислава, “Потічок” з Кошаліна, “Стебничанка” зо словацкого Стебника.

Лемківски обряди представлят колективи “Яворина” з Дрогобича і “Кечера” з Якубян в Словаччині. Серед танцювальних колективів своє мистецтво вкажут “Верховина” з Едмонтона в Канаді, “Карпати” з Липовлян в Хорватії, “Карпатянин” з Прешова, “Горицвіт” – колектив ІV Ліцею в Лігниці.
До вечірньой програми тогорічной Ватри запрошено: фольковий колектив “Русичі” з Білгорода -Дністровского під Одесом, професийний художний колектив “Джазова фіра” з Тернополя, “Беркут” з Ольштина, роковий колектив “Абу-Касимові капці” зо Львова. З Руского Керестура, в Сербії приїде роковий колектив “Крейзі кузінс”.
Заплянувано другу “Ватрочку”, ініціативу скєрувану до наймолодших учасників Лемківской ватри, котру приготували учні початкових і ґімназийних шкіл з пунктів навчаня україньской мови з лемківским діалектом в Ґладишові, Устю і Горлицях. Ватрочка то ріжни конкурси, м.ін. Міс Ватрочки, рідной бесіди, фотографії, малюнку, але тіж гри, забави і наука, напр., лемківской пісні і ріжного лемківского ремесла. На Ватрочці мож буде похвалити ся свойом творчістю, досягненями чи зацікавлінями.
Ватра в Ждини то тіж художні акції і виставки “Лемківского Єрусалиму”. В тім році посвячени Б.І. Антоничови. Як каждого рока одбудут ся конкуренції Лемківской Спартакіади і ріжни конкурси, для діти і для дорослих.
Ватра то головні спітканя – на ватрянім поли і в рідних селах. То велика радіст з вертаня в Рідни Гори, бо лем ту каждий лемко може в повни одчути тепло свойой Вітчизни, молитви в церкви і праві з каждим розмавляти в рідній бесіді.
Сердечні запрашаме!

“Наше слово” №28, 12 липня 2009 року {moscomment}

Поділитися:

Категорії : Лемки

Залишити відповідь

Ваша e-mail адреса не оприлюднюватиметься. Обов’язкові поля позначені *

*
*