Адам Вєвюрка ■ ЛЕМКІВСКА СТОРІНКА ■ №9, 2013-03-03
2012 рік ніс в собі пам’ят про Акцію «Вісла». Ми шукали свідоцтв нашой активности, які би заперечали, што депортація нас знищила. Прикладом є хоц би святкуваня ХХХ Ватри в Ждині, чи наши написи на таблицях по селах на Лемковині. Вшитки тоти старання ішли од наших організацій. То не був конец нашой активности. Голос забрали люде з нашой громади, яки вказали, што будиме ся на ново. Так якби ХХІ вік ніс кращу долю для нас, як меншини в Польщі. Прикладом є напевно популярніст «Енея» чи «Лемона», але думам, што маме іщи веце до вказаня.
«DaMyr» – то новий ансамбль нашой лемківской активности на заході Польщі. 20 січня в лігницкому театрі ім. Гелени Моджеєвской мали місце двa концерти (тільо було охочих) дебюту ансамблю «DaMyr». Концерти промували плиту «Дякую». Організатором були Театр ім Г. Моджеєвской та Об’єднання лемків при вспертю фінансовим фундації «Polska Miedź».
Ансамбль «DaMyr» дарувал не лем свою музику, бо в коридорі можна було почути спів фолькового лемківского aнсамблю «7 Кропки» та почастувати ся солодкима палятками. На двох концертах публіки було понад 500 осіб – і то не лем з різних стран Лігниччини. Треба повісти, што тот недільний вечер з’єднал нас вшитких, люде пришли, штоб почути НОВЕ – СВОЄ.
Тут напевно велька заслуга для Дарка Maтійчака, його жени Ані і вшитких членів ««DaMyr-у». Серед присутних гостей були євродепутат Пйотр Борис, депутат Роберт Кропівницкі та господар театру Яцек Ґломб.
Музика чарує запахом правди в словах. Свіжа, повна емоції. У ній жиют думки людини, повни традиції, але і краса родини (жени, сина Maксимa), Бога і природи. Дарко провадив нас монологом при музиці та мультімедяльних образах по своїм житю од Бортного, Богуши, Чорной біля Усьця, Kрильовой Руской (одкаль суд предки) аж до неба. Своїм виступом творив магнетизм. Вказував свою вдячніст найближшим за отримани добра, але і радіст, што вони на шляху його життя. Концерт був свідоцтвом чловека, яки знає ким є і што хоче робити, штоб сповнити свої мрії. Знаком ансамблю є ялиця – яка від віків росне в лемківских лісах та корінями міцно зв’язана з земльом, а галузі вибиваются понад дерева і переламуют вшитки границі.
Даркові, Ані та вшитким членам «ДаМиру» дякую за можливіст бути на вашому барз професійному концерті. Хай артистична душа будит вас до дальшой праці. Маєте дар передавати мир. Хай він буде в вас і в нас.
Хто не був на концерті, хай жаліє! І нехай вірит, што даколі почує «DaMyr»!
Коли хочете як найскоріше почути голос Дарка та його музичну творчіст, горячо запрошую на страну www.damyr.weebly.com – де можете ціж закупити CD «Djakuju», але і квитки на наступний концерт 16 квітня 2013 р. до Фільгармонії в Зеленій Горі. ■
