Олександр Маслей ■ ЛЕМКІВСКА СТОРІНКА ■ №50, 2012-12-09
В горлицкій домівці Об’єднання лемків 10 листопада перейшло остатнє передвиборче засіданя Головної управи ОЛ. Перебесідувано заходи минулого року. Найвеце о найбільшій імпрезі ОЛ – ХХХ «Лемківскій ватрі».
Звернено велику увагу на «старі» клопотаня ОЛ з конфесіями. Хоц ОЛ старат ся бити в діяню понад конфесіями, то ріжни недоліки і майнови справи обох конфесій, проганяют його заміри. Так било на остатні «Ватрі». Ріжни, незалежни від ОЛ причини, вернули відгуком початків «Ватр» в Ждині. Хоц як сам голова ОЛ Штефан Гладик повідав: «Кожна людина може ся помиляти, але, як то діє ся в конфесійному напрямі, то юж пробачиня не є. Помилив єм ся, што до території юрисдикції греко-католицького єпископа кир Володимира при повитаню на «Ватрі», і тото зрозумлено – што спеціяльні. Но што ж, іщи раз перепрошую владику і вшитких»!
Довго заняло обесідуваня одбитя з‘їзду, переголосувано на другу половину січня. Як радив голова ОЛ, «чекає нас зміна поколіня в ОЛ і будме на тото готові». Дуже радісніша била наступна частина засіданя. До домівки ОЛ завітав генеральний консул України в Кракові Віталій Максименко, який від імені МЗС України вручав почесні грамоти заслуженим громадским і суспільним діячам. Грамоти отримали: староста повіту Горлиці Мирослав Вендрихович, війт ґміни Устя-Горлицкє Димитро Ридзанич, Василь Шлянта – заступник голови ОЛ, та поет Володислав Грабан, який не зміг відібрати з причин незалежних від нього. Від імени нагороджених слово взяв Василь Шлянта, які принукав зібраним свою публікацию з 80-их років минулого столітя о діаспорі «Полонусі», в які писав: «Прийде може час, што Україна спомне нас»! І як рюк, так і стало ся!
Далі обесідувано з В. Максименком стежку допомоги від України діаспорі. Обговорено інвестиційні справи на полі «Ватри», стан фінансів ОЛ і справи ріжни. Голова поіформував про нові двомовні таблиці місцевости на Лемківщині. Війт ґміни Устя-Горлицкє повів, што «найвеце злого роблят в тих справах журналісти, для яких найліпша інформація – то зла інформація. Але завдяки Богу і розумним людям вдало ся».
Голова Ш. Гладик запізнав зібраних з поїздком на сеймову комісію до справ національних меншин. Обговорено остатнє виданя квартальника «Ватра». Били застережиня до публікації листу о. Аркадія Трохановского, тому што друга сторона не мала ніякого відгуку.
У справах ріжних перебесідувано можливіст передовжиня договорів роботи для бивших працівників ОЛ. ■
