(ред.) ■ ЛЕМКІВСКА СТОРІНКА ■ 2009-10-02
Осіннє число квартальника Організації оборони Лемківщини “Лемківщина” приносит актуальну інформацію з літнього сезону житя лемківской громади на північно-американьскім континенті.
Галина Семеняк представила 9 Лемківску ватру на оселі в Елленвіл, в США, котру зорганізували спільно ООЛ і СУМ в Америці. 4 липня на початок ватри Аня Чеберенчик заспівала пісню “Гори наши”. Староста фестивалю Василь Гаргай привитав прибилих і попросив владику Павла Хомницкого о поблагословліня свята. Стефан Гованьский в імени ООЛ наголосив в своїм виступі, же Ватра має великє значиня в збережиню і ширіню лемківской культури.
Становит она символ єднаня лемків насильно вигнаних з прадідівских земель. Окілко лемківский фестиваль зберат каждого року дуже люди, котри не знают “ким сут лемки і одкаль ся взяли”, другий представник ООЛ Зенон Войтович дав в своїм виступі одповід на тоти питаня. “Аничка” продовжила виступ, глядаче співали і таньцювали разом зо співачком, подивляли тіж єй чудовий правдивий лемківский жіночий стрій.
На довго лишили ся тіж в памяти глядачи звуки скрипки віртуоза Василя Попадюка з Канади, котрий знав порушити серце і душу каждого слухача. Андрий Байса з львівской “Лемковини” розвеселив публіку лемківским гумором, як тіж зворушив лемківскима піснями. Виступили тіж сестри Надійка і Наталя Павлишин, дует Алла Куцевич і Андрий Турчина, хор “Нова українська хвиля” з Пасейку. З захопліньом принято виступ танцювальних ансамблів “Золотий промінь” з Гартфорду, “Червона калина” з Джерзі Ситі і “Мрія” з Пассейку. Вечером мож било потанцювати при музиці ансамблів “Українська сенсація”, “Галичани”, “Удеч”. Традиційом фестивалю стало ся юж печиня поросят і продаж традицийних страв.
В неділю 5 липня одбило ся шторічне Свято Героїв, владика Павло Хомницкий і о. Богдан Данило, ректор семінарії св. Василя в Стамфорді одправили Святу Літургію при супроводі хору церкви св. Миколая з Пассейку.
В дальшій частині “Лемківщини” Павло Лопата цікаво пише о 24 Лемківскій ватрі в Канаді, котра одбила ся 1-3 серпня на оселі “Лемківщина”, недалеко од Торонто. Ватра розпочала ся канадским і україньским гимнами, котри заспівав соліст Віктор Шевель. Гости витали ведучи програми Лариса Баюс і Адам Стець. В своїм виступі голова Обєднаня лемків Канади Петро Гриньків повів: “Де би нас лемків лем не розогнала лиха доля по цілім світі, зберегли зме вшитко, што серцю найближше – нашу бесіду і нашу культуру. Будме горди з нашого походжиня, бо зме лемки, били зме нима і будеме!”. Офіцийну мистецку програму попередили найменши діти, котри занимали ся малюнками, співом пісні і деклямуваньом віршів.
На сцені виступила танцювальна група “Мак” Івана Кузіва, саксофоніст Михав Романяк, народни пісні співали Адріяна Туз, Соня Михнєвич, родина Бабяків зі Словаччини. Популярни пісні грала до танців група “Карпати”, а на конец програми запропонувано молодіжну забаву до музики “ді-джея” Тараса Соболевского.
Величава 25 Ювілейна Лемківска ватра одбуде ся юж за рік.
Осіннє число “Лемківщини” вшановує тіж 100-літя од дня народжиня Б.-І. Антонича. Заміщено кілька віршів і редакцийну статтю, написану на підставі публікації С. Гординського. Опублікувано спомин професора Івана Зілиньского з нагоди 130-літя од дня народжиня. Памяти Теодозія Старака – першого Спеціального посланника Уряду України в Польщи, колишнього голови Світовой федерації україньских лемківских обєднань посвятила Марія Дупляк свій спомин під наголовком “Він був гордістю нашої лемківської родини”. “1 жовтня 1999 р. передчасно одишов од нас щирий патріот України, котрий ціле своє житя служив єй віром і правдом. Одишов од нас вірний син свойой ужшой Вітчизни – Лемківщини, котрій оддав остатні роки свого житя” – написала М. Дупляк.
“Наше слово” №40, 4 жовтня 2009 року {moscomment}
