Анна Лабівска ■ ЛЕМКІВСКА СТОРІНКА ■ №7, 2014-02-16
Гурток Об’єднання лемків і греко-католицка парохія Різдва Пресвятої Богородиці в Олаві черговий раз зорганізували Щедрий вечер. Організацийом заняли ся голова гуртка ОЛ в Олаві Штефан Чупик, Данута і Мирослав Співаки.
Олавяне зобрали ся на вспільни молитві, а по ней засіли до стола коштувати традіційни, пістни страви вспільно в єдни великі родині 18 січня в ресторані «Заціше». А коли заспівали щедрівки, в ресторані шиби дзвонили. Того року было нас винятково дуже, деси більше як 80 люди. То барз важне, коли поколіня ганебной акцйі «Вісла» і поколіня іх виходців хцут ся стричати, хцут плекати рідну традицию. Не забракло і молитви, і думок за Майдан в Києві.
Не забракло і зворушинь чисто людзких зо вспільной молитви, колядуваня і гостини. Барз тішит, што приходит штораз веце люди, вшитки разом гостиме ся, бесідуєме, наши діти доказуют. Таки зустричи міцно звязуют наше середовище, вчат пошани до віри, традицйі і каждого чловека, його віри і поглядів. На Щедрим вечері в Олаві не важне, хто якого віросповіданя. Видно, што вспільне святкуваня вписало ся в календар лемківских ініціятив.
Дякую вшитким олавянам за спітканя, спільну молитву і вспільну святочну гостину. Дякую організаторам за добру організацию і вашу суспільну працю. Дай Боже за рік добєме до «сотки». ■
