Олександр Маслей ■ ЛЕМКІВСКА СТОРІНКА ■ №2, 2013-01-13
Церкви в Рихвалді (тепер Овчари), в Брунарах-Вижніх і Квятони перешли міцний перегляд експерта Міжнародной ради охорони Заповідників (ICOMOS). Пані д-р Єлефтерія Тосканіка з Греції перез декілька годин докладно обзерала церкви в нашим реґіоні. Головні від єй оцінки залежати буде, чи впишут на листу Сьвітовой спадщини UNESCO тоти церкви.
През цівий тиждень д-р Є. Тосканіка оцінювала церкви з польского і україньского боку Карпат. Смотрила, фотографувала, порівнювала внески з тим, що можна видіти на свої очи. В цілоденним обзераню товаришили єй малопольский воєвідский консерватор заповідників Ян Янчиковскі та керівник делеґатури в Новому Санчи Кристина Меньо і Анна Добровольска, побіч плантали ся нови власники церкви з Жешовской і Тарнівской курії. Бив присутні староста горлицкі Мірослав Вендрихович та війт ґміни Устя-Горлицкє Дмитро Ридзанич.
Тяжко повісти, ци дашто з того буде. Виришальной оцінки можна сподівати ся на весну. Юж раз церкви мали бити вписани на листу UNESCO, але як то биват, уряд Польщи подав лем свої дерев’яни «kościółki», а з нашима церквами можна било лем ся обійти. Кожна споруда мусит заховати свій первісний характер та мусит ся позбути штучних елементів вистрою, нич не може «сварити» ся з первісним вистройом церкви, навіт посаджени дерева навково нєй.
Остаточна оцінка вписаня на листу UNESCO буде залежава від експертів, яки передадут рапорт Комітету сьвітової спадщини. Іщи пригадам, што перегляд церков бив зв’язани з проектом «Деревляні церкви в польским і українским реґіоні Карпат» номінувані до вписаня на листу Сьвітовой Спадщини. Всього проект пропонує 16 об’єктів, три з них в Горлицкому повіті. ■
