Адам Вєвюрка ■ ЛЕМКІВСКА СТОРІНКА ■ №50, 2015-12-13
У Горлицях 14 листопада в бюрі той організації при вулиці Ягєлли, 4 відбулося засіданя Головной управи Обєднаня лемків. На засіданя приіхали делегати і з західних земель, і з цілой Лемківщини.
На вступі хвилином тиши віддано честь памяті покійному старости «Ватри» в Ждині Петрові Чухті. Потім на підставі порядку почалося засіданя. Представлено звіт з таких проєктів за 2015 рік, як: «Лемківска ватра» в Ждині, лемківски «Кермеши», діяльніст ансамбля «Перстеник», співпраця з Фірмом молочном «Dominik» чи студентами-науковцями, які занимаются давним будівництвом села Лоси. Бесідувано ціж о проєкті ОЛ Канади – виданю альбуму про Єпіфанія Дровняка – Никіфора, які би бив поглядом лемків на творчіст і житя нашого видатного маляря.
В дальшій частині представлено пропозиції проєктів на 2016 рік. Головном темом била організація IX зїзду ОЛ, які буде проходив 30 січня в Горлицях. Вшитки зауважили, што треба веце заохотити учасників зїзду до активного уділу в дискусіях і штоб делегати представляли свої пропозиції, але і успіхи, проблеми, які мают в своіх гуртках. Лем активна співпраця з гуртками може внести нові акценти і зміцнити організацію. Кожний гурток має свою специфіку і віддає стан лемківского житя на території, де ми є. Підкреслено, што на підставі статуту є можливіст діяня молодіжной секції. Барз цікави билі пропозиції до розвитку організації. Засигналізувано потребу будови задашиня публіки «ватри» перед дощом і сонцем та вказано, што тот проєкт є в тракті документа-ції. Але і відтвореням лемківских строїв, з підкресліньом оригінальности і різниць медже селами.
В справах різних Штефан Гладик вказав на потребу уділу ОЛ в ІІ Карпацким зїзді, які буде мав місце в серпни 2016 року в Сяноці, і штоб бив він під патронатом президентів Польщи, Словації і України, та што є пропозиція створеня карти регйональних мешканців Карпат, де лемки-русини мают своє важне місце. Барз міцно підкреслено, што не можна вказувати, што світ лемків – то лем кропка чи кропля. А остатньо в медіях часто тото можна видіти і прочитати. Маме веце лемківских елементів в нашій традиції і культурі, што є красни і лем наши. І тото треба вказувати – вшитки делегати то міцно підкреслили. В дискусіях вийшла пропозиція: на ювілейну «ватру» старатися про патронат ЮНЕСКО. Я запропонував, штоб на «ватрі» в Ждині вручити нагороду «Вірний предкам» для ансамбля з Вроцлавя «Клюб 46» (скоріше «Орден», «Ромен»), якій не раз виступав не лем на «ватрах» в Ждині, але і всперав нашу школу в Лігниці, будив житя студентів на вулиці Рускій у Вроцлаві чи на райдах «Карпати», які є історійом ціж Лемківщини по 1947 році. Вшитки на тото пристали.
Голова Омелян Гойсак представив успіх ОЛ в стараню про поверненя лісів. Є надія законна, што деяки лемки з того скористают. З том надійом, што хоц кус пригасиме зло Акції «Вісла» та віддаме лемкам іх власніст, закінчено засіданя ГУ ОЛ. ■
