Олександр Маслей ■ ЛЕМКІВСКА СТОРІНКА ■ №51, 2013-12-22
Семого грудня 2013 року одбыло ся ІІІ статутне засіданя Головной управи Обєднаня лемків (ГУ ОЛ). Засіданя відкрив голова ОЛ Штефан Гладик. Привитав членив і присутних гості, попросив зібраних о вшануваня памяти члена ГУ ОЛ і головного редактора квартальника «Ватра» Петра Шафрана, який недавно одишов у вічніст. Зібрани встали і хвилином мовчаня вшанували Померлого.
В програмі засіданя обгварено діяльніст ОЛ медже І і ІІ засіданьом Головной управи. Підсумувано ХХХІ Лемківску ватру. Голова Ш. Гладик здав справозданя з заходів, реалізуваних в 2013 році і з діяльности Головной управи. Аналізувано заходи на 2014 рік.
Дашто веце часу заняло голові ОЛ виясніня членам управи його відкликаня з членства в Комісії вспільной уряду РП і нацменшин.
Голова вказал цільну політику Міністерства адміністрації і цифризації в діяню на розподів лемківского середовища.
Нештодавно в перших днях грудня голова ОЛ Штефан Гладик і його заступник Штефан Клапик та депутат на Сойм РП Мирон Сич спіткали ся з міністром середовища Мацейом Ґрабовским в справі повороту майна, заграбленого нам в Акції «Вісла». Міністер повів, што Устави реприватизаційной не буде і єдином дорогом до відзисканя майна є суд, але, як звичайно, обіцяли, штоби ся не журити, найде «найкожистнєйшом, найшибшом сцєжке». Якоси єм ся не втішив, вшитки уряди РП од 1989 року обіцюют нам, же недовго. Перши міцно працювали над уставом реприватизаційном, не знам докладні, але хибаль было зо 20 проектів.
В тот час здолали потворити в наших лісах парки народови (Маґурскі), зачали по кус оддавати, докля Державни ліси не вопхали ся на «строне», тепер зас обіцюют – але 100% то є грушки на вербі!
Секретар ГУ ОЛ Еміль Гойсак здав справозданя фінансове з проектів, яки реалізувало ОЛ.
Наступні підсумувано ХХХІ Лемківску ватру, дискутувано над програмом ватри і як єй розреклямувати.
Голова Ш. Гладик звернув увагу, што діяльніст ОЛ не має ретельной презентації свого доробку і тото треба змінити.
В дальші частині засіданя обгварено справу вакату головного редактора квартальника «Ватра». Дотеперішні члени редакції не підняли ся взяти на себе обов’язків редактора «Ватри».
В 2014 р. буде проходила 100 річниця закладеня концтабору в Таллергофі. ОЛ приготовує програму відзначиня пам’яти помордуваних в тим концтаборі.
Василь Шлянта поінформував присутніх, што в тим році минає 10 річниця діяльности Лемківской фундації освітньой, попросив пам’ятати о 1% на діяльніст фундації.
Вікторія Гойсак просила про збериганя документів і фотографій з Лемківщини і поширяня засобів архіву ОЛ.
Вечером члени ГУ ОЛ обізрили в приміщинях ЦК ім. Б.-І. Антонича в рамках проекту ЦК ім. Б.-І. Антонича «Зимове кіно». презентувано фільми з програми ТV «В етнічних кліматах»: «Згадуваня святкуваня», реж. Вальдемар Янда, ТV3 Краків, 2006 р. (20 хв.), «Бити собом на штоден и од свята», реж. Вальдемар Янда, ТV3 Краків, 2008 р. (20 хв.), «Там на Лемковині», реж. Данута Кашевска, ТV Познань 2008 р. (15 хв.).
Використано фільми з архіву Товариства Лемко-Товер. ■
