Адам Вєвюрка ■ ЛЕМКІВСКА СТОРІНКА ■ №10, 2014-03-09
Як што року, 1 березня Головна управа ОЛ засідала, штоб затвердити фінансовий звіт з діяня ОЛ в 2013 році і пробу підсумуваня вшитких заходів той організації, але і не лем тото.
На початку вшитки учасники віддали честь хвилином тиши загиблим на Майдані — Небесній сотні, де ціж проляла ся лемківска кров.
Управа прийняла фінансовий звіт, який представив заступник голови ОЛ Василь Шлянта. Підкреслено, што продовжуєтся ограниченя дотації міністерства в рамах ощаджаня і на меншости, то є коло 3 млн. зл. І так вшитки затверджени проєкти ОЛ лішили ся на таким самим рівні, окроєно лем кошти утриманя інфраструктури. Зауважено, што кошти цілий час ідут вгору, навіт оплата почтова, а то торкає найбарже висилки «Ватри».
Головна управа потвердила конечніст континуації попередних проєктів, між іншима: кермешів, Лемківского Єрузалем, видавничой справи. Голова Штефан Гладик підкреслив, што не закінчено справу лемківских представників у спільній урядовій комісії. Міністерство не відповіло на письмо 9 лемківских організацій, які потверджуют потребу представника ОЛ в комісії, як і відкликаня Олени Дуць-Файфер.
Обговорено пропозиції організуваня Лемківской ватри. І тут голова підкреслив, што тот рік для Ватри буде роком будовничой інвестиції. Запляновано будову вяти, яка має заступити шатро і допомочи в промоції ватряного поля та перебудову будинків – бюр при вїзді, вході на Ватру і т.п. Дофінансуваня на тото позискано з проєктів. Представники Головной управи ОЛ з заходу країни, за словами Адама Вєвюрки висловили потребу повороту до вибору Місс Ватри, яка серед молодих ватрян барз цішит ся зацікавліням. Організаційом того має власне заняти ся «захід». А. Вєвюрка, як голова Товариства 4 Ліцею з Лігниці, запропонував, што випусники той нашой школи хочут зорганізувати своє свято в четвер перед Ватром. Управа ОЛ з радістю затвердила таку пропозицію. Так што абсольвенти 4 ліцею приїжджайте в четвер на Ватру. Ждиня жде на ВАС!
Затверджено ціж нового головного редактора журналу «Ватра» після смерти Петра Шафрана, яким стала пані Вікторія Гойсак. Одноголосно принято, што 28 квітня стане Днем памяті про Акцію «Вісла», але і вказано потребу вшануваня ювілеїв, між іншима 200 літ від народжиня Тараса Шевченка і жертв Талергофу, што повязано зі 100 річницею розпочатя І Світовой війни.
Ціле засіданя проходило в атмосфері подій в Україні, де популярна пісня на Майдані «Пливе кача по Тисині» є прикладом, што там ціж бє лемківске серце, хоч покрите кровю. ■
